今日要介紹既就係即將推出樂隊首張大碟既Comma
FB Page:
(BV = Bom Voyage C=Comma)
BV: 不如介紹下你地樂隊丫 (組成經過, band名意思, 玩既音樂類型)
C: 我地係本地獨立樂隊Comma ，成立於2013 年，由 主音－Tim、結他手－昇、低音結他手－匡、鼓手－程四位成員组成，我地幾位成員都係透過網上討論區搵bandmates時同朋友介紹認識既。樂隊名字既來源同意義其實係希望活在繁忙都市的香港人，每次見到我地呢個"逗號"都可以停一停，暫時放慢自己的腳步，欣賞身邊的人、事和物。我地都想用正面的歌詞和旋律去感動同埋為繁忙的都市人打打氣！而我地玩既音樂類型主要都係POP ROCK 為主。
BV: 有邊d bands/歌手影響你地最深架?
C: 我地幾位成員本身各自有聽開好多唔同類型既音樂。而大家既共同喜好及對我地創作上有影響既就包括有Mr. Big, Red Hot Chilli Pepper, Muse, My Chemical Romance等等既樂隊。
BV: 你地組成呢三年都有過唔少演出機會, 亦參與過唔少比賽, 拎過唔少獎項…你地滿意呢三年既成績嗎? 有冇邊次經驗係最令你地難忘?
C: 成績其實對於我地黎講唔算好重要，我地重視既反而係我地既音樂能唔能夠感動觀眾，所以係好開心同感謝呢三年真係有機會參與好多唔同類型既比賽同bandshow。其實每一個演出對於我地黎講都係好寶貴既經驗，一方面可以將我地既作品表演俾人聽，第二方面可以訓練我地既舞台經驗同合拍性，我地相信一個理念係 “沒有最好，只有更好” ，所以我地一直都好珍惜呢啲表演機會，希望每一次都有進步，感動更加多既人。
我地試過係幾間大學如中大、科大、教育學院和浸大等地方參與作為佢地bandshow既表演樂隊，呢類型既bandshow相對黎講都令我地難忘，因為台下既同學仔觀眾往往都好活躍，好容易就同我地既音樂有互動，佢地愈投入，我地就更加盡情同落力去表演。
BV: 香港而家越來越多人夾band或玩音樂, 但演出機會又好似越來越少~ 你地認為可以點樣突出自己, 令更多人認識你地?
C: 首先音樂方面一定要有適當既水準同具備自己既風格。另外其實而家網上唔同既平台係俾我地有一個好大既宣傳空間。其實好多獨立樂隊的MV都會自己一手一腳拍攝，同時又會放自己的作品上網播放，咁就係一個令更多人認識你既樂隊既好方法。
BV: 你地覺得香港夾band係件困難既事嗎?
C: 香港玩音樂要玩得好其實係有難度既，因為香港社會投放係音樂既資源係相對比較少，而且好多香港人既價值觀就係玩音樂相對其他既行業／專業黎講係無咁有前途，亦都真係有好多全職音樂人既生計唔穩定同無保障，令好多有興趣同天份既人對玩音樂卻步起黎或中途放棄，慢慢做成一個惡性循環令而家香港音樂既質素每況如下。但咁樣既情況底下先令到我地真心同有熱誠既人團結起黎，決心想做好既音樂出黎去貢獻社會。
BV: 聽講你地黎緊推出既專輯, 搵左Rubberband阿偉做監製, 對住佢會唔會有種壓力呢? 可以分享一下錄音過程既趣事或難忘事嗎?
C: 對住阿偉當然唔多唔少都會有壓力，製作過程既要求比起我地初初自己做demo時高得多，但呢個正正亦係我地需要既野，始終rubberband 係香港一隊著名既樂隊，阿偉絕對俾到我地好多專業既意見去令我地改善同埋幫我地去做好黎緊第一張既專輯。
BV: 大碟而家進度如何? 幾時推出, 同埋會做什麼宣傳上既計劃?
C: 進度都幾理想，專輯既內容都已定好落黎，錄音亦差不多去到最後階段，booklet既設計都進行緊。我地初步預定專輯會係大約7月至8月既時間推出，黎緊好快都會拍我地其中一隻主打歌既MV，會係專輯推出前一個月放上youtube及我地既FB專頁等大家可以預先聽到我地既主打歌。我地亦都籌備緊係專輯推出既同一日搞一個CD Release Party，等大家可以係買我地既專輯既同時欣賞我地既現場演出。
FB page:
https://www.facebook.com/comma.hk/?fref=ts
https://www.youtube.com/user/Commahk
沒有留言:
張貼留言