Friday's pick/周五挑 vol. 38 - 劉卓軒

Bom Voyage FB page每逢星期五都會刊登“Friday's pick/周五挑” 環節，介紹一下本地樂手/樂隊!

今日介紹既係「地契哥」，如果冇印象可以參考返: http://hk.apple.nextmedia.com/supplement/special/art/20151002/19316967

佢同時係樂隊「未能接通」既主音歌手，係一位全職音樂人包辦幕後音樂製作同幕前既演出!

佢叫Hinry，劉卓軒

(BV = Bom Voyage H =劉卓軒 )

BV: 幾時開始發現自己喜歡音樂/唱歌? 邊個啟發你既?
H: 其實中學時期我已開始有唱下 singing con咁， 但真正啟發我既係DJ 黃志淙!
2011年我入左港大，而當時咁岩就係HKU既一百周年!  當時黃志淙係通識教育既總監，佢負責一百周年既校慶活動， 想搵D學生唱chorus!  我唔知頭唔知路咁就參加左個audition。當時佢仲邀請左好多HKU既校友參加，好似搵左許冠傑先生為校慶作曲，林夕填詞，周博賢監製，仲有機會同謝安琪同許廷鏗合唱! 當時雖然開始接觸音樂，但我仍然好似咩都唔識咁既! 到2012年同2014年，許冠傑都有舉行紅館演唱會，佢邀請左我地呢d冇咩經驗既學生一齊唱歌! 當時我都有諗過，自己會唔會都有機會好似呢d前輩咁，可以以音樂作為職業呢?

BV: 咁你幾時開始正式成為本地既獨立音樂人?
H: 大約係2013/2014年，當時同朋友一齊創辦左一個叫JL Music既音樂label 。當時係由八個好喜歡音樂既朋友一齊組成既! 之後大家就 開始接下show， 學下作曲編曲同做下自己既歌。同時我亦參加左中國好聲音香港區選拔賽，好好彩得到冠軍，可以代表香港到上海出賽。可能因為咁，當時多左唔少行內人會留意到我，亦都有唱片公司會主動接觸下我。

BV: 平時有見你busking，又有見你夾band， 其實你係開始邊樣野先?
H: 我係同阿Fing (未能接通鼓手) 由busking開始認識。當年我同佢開始玩，我唱歌彈結他，佢就打cajon。當時大家都好希望可以組成自己既樂隊夾band，兜兜轉轉下就搵到Rocky (未能接通bass手) 同KK (未能接通結他手)，咁就組成左「未能接通」! 其實都只係呢兩年之內既事。

BV: 你覺得solo artist同夾band做vocal有d咩唔同? 你會enjoy邊樣多d?
H: 夾band其實team work重好多，因為大家會好齊心去做一件事! 但唔好既當然係多人就會多意見，要四個人方向一致先可以做好件事，而且相對上係需要溝通多d既! 至於solo artist就只係得自己一個，冇左同伴一齊去冒險既感覺。好處就係行動性比較強，諗到想做既都可以即刻去做。

BV: 地契哥一事有冇令你多左人識或多左機會?

H: 係多左人識既! 同埋會多左人搵我做show，因為呢件事當時都幾多人談論。

BV: So far自己最難忘既演出係邊一次?
H: 好多都係同隊band一齊發生! 試過一次喺PMQ演出，我喺台上跳來跳去，唔小心踩甩左結他手KK條jack線，攪到結他冇晒聲! 同埋點解我地叫「未能接通」係因為我地好多時候都打唔通電話，遲到呀…  有次比賽我已經約定大家早一個鐘要到，點知bass手同琴手都遲大到，足足遲左個幾鐘，當時我地冇得揀一定要上台喇，仲已經開始計緊時，10分鐘倒數緊。果陣時得三個喺台上面，仲有兩個未到…. 唯有係咁拖延時間啦! 到最後得返3分鐘既時候，佢地終於都到喇，但我地就得返好少時間玩…  果次真係最難忘!

BV: 黎緊「未能接通」同你個人方面會咩攪作呀?

H: 如果for未能接通，我地都錄緊歌，希望會出集碟！暫時錄好左四隻歌! 至於個人呢，我幕前幕後都會做既! 幕後就有接一d電影既工作，早排做左兩套上畫電影既音樂! 此外我都會接d廣告，幫人作曲填詞同幫d歌手寫demo! 至於幕前呢，我黎緊會推出自己EP呀，目前已經去到揀歌既階段喇!

FB page: 
https://www.facebook.com/HinryLauCheukHin (Hinry)
https://www.facebook.com/callbackasap/ (未能接通)

Youtube channel: 

https://www.youtube.com/user/HinryLauCheukHin 

Friday's pick/周五挑 vol. 37 - Jacky Man

Bom Voyage FB page每逢星期五都會刊登“Friday's pick/周五挑” 環節，介紹一下本地樂手/樂隊!

今日想介紹一位年輕bass session佬比大家認識! 佢係2011年勇奪Yamaha Asian Beat亞洲總決賽冠軍樂隊Jukator既bass手，當今係唔少本地流行歌手如陳柏宇，周柏豪，小塵埃等等既bass手，Jacky Man。

(BV = Bom Voyage JM = Jacky Man)

BV:  不如講下點解你會學bass? 你係受邊隊band/bass手影響既?

JM:  如果講最早期鍾意嘅Bass手，應該係X Japan嘅Taiji，當時聽到佢嘅Bass Line就好鍾意呢個樂器。

但如果講到最著迷嘅，就一定要數Angra嘅Felipe Andreoli，我到今時今日聽佢啲Bass Lines都仲會熱血沸騰！仲有Dream Theater、Symphony X、Mr. Big等等，咁當然唔少得Victor Wooten啦。

BV: Jukator係唔係你第一隊band? 你覺得呢隊band對你算唔算有好大既影響?

JM: 真係喺Indie Scene會對外演出嘅Band，Jukator算係第二隊，我之前仲玩過一隊Power/Gothic/Speed Metal嘅。

至於Jukator，對我嘅影響真係極大，如果無呢隊Band，我而家嘅所有嘢一定完全唔同，起碼嗰陣無quit到份工先。

當年有機會出去北京同首爾嘅兩個比賽見識一下，又咁好彩拎到好嘅成績，俾到自己一個交代，跟住去到出碟有好多好朋友支持，呢一切到而家都仲歷歷在目。

如果唔係有呢啲經歷，我未必夠膽行而家呢條路。

BV: 你幾時開始做session佬? 至今同過邊d artists合作?  當中有冇d咩難忘野可以分享下?

JM: 第一次做Concert同入Studio錄音都係2015年1月，嗰場 Concert係周柏豪嘅，至於錄音，就係陳柏宇嘅。但講最早同Artist合作，就係2014年同Lil' Ashes小塵埃玩一個Music Festival囉。

除咗佢地之外，都有同過衛蘭、側田、連詩雅、林奕匡、Robynn & Kendy、許廷鏗、狄易達等等合作，同埋有喺謝安琪同方大同嘅演唱會綵排方面幫過手。

Band界嘅話，就幫過一隊叫Doracor嘅意大利Progressive Rock Band錄佢地第十隻專輯裡面嘅幾隻歌。

講到難忘嘢，有一次on show其中一part要用Hot Hand，轉咗effect之後就突然間乜聲都無，sound check嗰陣明明無事，完show唔忿氣再試又無事，線又插啱哂，電又係新嘅，而家諗返起都覺得好邪，堅係驚驚地。

 BV: 未來會唔會組返band? 除左做session bass佬之外, 仲有冇其他目標或計劃?

JM: 呢個就一定會！無Band夾好辛苦嘅！已經傾緊㗎喇，希望可以快啲成事啦！

除咗嚟緊呢隊Band同Session之外，我都希望寫下自己嘅作品，Bass歌又好，Instrumental歌紀錄下自己啲Idea又好，再將呢啲作品集合成一隻EP或者Album，呢個會係我其中一個大目標。

如果講到實質嘅計劃，唔知你地記唔記得上次Bass Camp嗰度我有一Part係同個Vocal rearrange咗一首歌？今次我真係會resume返呢個Bass + Vocal嘅Project。其實呢個Idea有咗一段時間  ，不過一直都未真正做到啲嘢出嚟，今次真係有㗎喇！

BV:  對於上次攪既bass camp有咩感想?  如果之後再攪, 你會希望加入d咩環節/內容?

JM:  多謝你地上次請我一齊玩！其實上次已經好正！真係幾開心香港會有一個咁嘅event，我喺YouTube見外國間中都有呢啲function，成日都想香港會有！我就比較貪心嘅，如果之後再搞嘅話，個場有得用埋full band就真係perfect喇！搞多啲啦，諗諗下都有好多好正嘅主題可以搞喎！下次再搞叫埋我玩啦！

BV: 黎緊有咩忙呀?

JM: 嚟緊Jason Kui會出碟吖嘛，一月會同Jason Kui Band玩一個show，跟住同佢喺美國返嚟之後，佢就應該會開始度佢嘅CD Release，詳情未定㗎，大家想知就留意住佢Facebook先啦。除咗Jason Kui Band之外，我諗2017年除咗Session，主要時間都會放喺頭先講嗰隊Band、Bass + Vocal Project同埋Solo嘅作品上。希望隊Band同個Project都會喺2017有啲嘢俾大家睇啦

FB page: https://www.facebook.com/jackymanck/

Friday's pick/周五挑 vol. 36 – NastyDudes

Bom Voyage FB page每逢星期五都會刊登“Friday's pick/周五挑” 環節，介紹一下本地樂手/樂隊!
今次訪問既係4人hard rock樂隊NastyDudes! 組成只不過兩年幾既佢地，係唔少樂隊比賽既常客，仲要拎左唔少獎項! 香港地玩hard rock既bands好少，仲要咁年輕! 一定要撐啦係咪!

黎緊佢地仲會參與我地1月13日Friday's Pick Party既演出tim!

https://www.facebook.com/events/2175806359312178/

(BV = Bom Voyage ND = NastyDudes)

BV: 首先講下你地組成經過啦!
ND: NastyDudes樂團在2013年成立, 曲風主要玩美式搖滾為主。 最初樂團成員只有主唱Terry和結他手Kim, 他們在美國音樂學院Musician Institute結識拼且成立了二人組合NastyBrothers (NastyDudes的前身), 活躍於洛杉磯的音樂表演活動。2014年9月Terry和Kim回到香港發展,透過低音結他手Warren和鼓手Poon的加入, 成為了現在的NastyDudes, 在香港也參與了大大小小的樂團比賽和演出。

BV: 本身大家都喜歡hard rock嗎?
ND: 一定！因為大家本身最主要都是聽hard rock長大，但其實我們對不同音樂類型都感興趣例如blues，jazz，funk，country，classical，pop等等。

BV: 呢個lineup組成左2年幾以來，有冇d難忘事情或演出可以分享下呢?
ND: 哈哈哈哈有! 記得我地有一次初賽咁我地如常準備係台上玩啦! 玩玩下high得濟Terry一腳踢走左我個effector連線都甩埋，但我又好冷静咁整好再繼續比賽完左先識驚hahaha! 
第2單一定要講我地鼓手Poon.. 因為佢出成日出show或者比賽都會整甩d野，好似今年帶比賽決賽個陣佢踩甩左個 bass drum個錘跟住餘下個半首歌都只可以用隻左腳去踩，跟住又有一次出show佢打打下鼓唔知張櫈鬆定點，佢差d成個人向後跌落台。
 
BV: 咁又講下你地比賽丫，好似都拎過唔少獎wor! 新band來講你地覺得自己算幸運嗎?
ND: 其實我覺得我地比較幸運既係我地好快搵到樂隊既方向! 最開頭我地未搵到方向既時候試過寫左一首歌就膽粗粗玩左一個比賽最後我地初賽都入唔到hahaha之後我地反覆諗左好耐最後定左hard rock做我地既方向! 原因係除左我地鐘意之外，係因為我地4個既性格都幾hard rock，哈哈哈! 想做就全力去做，可以做返自已係最舒服。最開頭其實好多人都唔係幾睇好既，但我地覺得唔做過又點知呢加上有少少唔服輸咁諗點解覺得hard rock唔得?
講起比賽我地反而幾enjoy因為每次去都識到新朋友，係一個好好既交流地方。其實每次我地去比賽都會平常心去玩目的係想更加多朋友聽到我地既音樂。好老土咁講拎唔拎到獎係其次感唔感動到觀眾我諗先會係我地最關心既事或者最想做到既事情

BV: 香港玩hard rock既bands唔多，其實咁可能仲好，易d比人記得
ND: 其實可以咁講，但最好既就緊係多d人可以一齊玩呢類型既音樂啦!

BV: So far 你地既目標achieved左幾多? 2017有咩係希望會發生架呢?
ND: 其實我地仲係好開頭好新都唔可以談得上達到d咩目標住hahaha! 
2017我地有好多野想做! 第一樣就係出隻EP先啦，我地而家已經準備錄音! 另外想搞多d shows或者玩多d show啦 ! 去下廣告先，我地其實已經同Bamboo Star同埋黑白樂團籌備緊1月14號既一個band show! 大家記得支持呀! 最後就緊係繼續寫多d正歌啦，最好搵到唔同既音樂人合作擦多d唔同既火花。

BV: 點睇目前香港既indie band scene?
ND: 開始越來越好，樂隊質素都好好。最緊要係，越來越多人會留意不同類型音樂既樂隊! 而觀眾真係會去睇show而會係只係紙上談兵，因為觀眾真係肯去睇band show其實都係對一眾band仔band女既一份支持同肯定! 仲有多左唔少平台可以比唔同既band友去玩去發揮!

BV: 嗯嗯! 覺得點樣可以吸引到更多人支持本地樂隊同去睇show?
ND: 我覺得本地既show係需要宣傳比到更多人知啦! 其實大家都知band仔冇咁多經費去做宣傳，所以如果可以搵到多d sponsors 支持，幫手做宣傳既話會有幫助! 相信會有幾多觀眾想睇，但唔知可以喺邊到搵到呢d類型既音樂會睇! 所以有多d sponsors去支持，幫手一齊去promote，我覺得多左人知就會多人去(慢慢本地band shows就可以變成一個大家都會想起既選擇! 好理想地諗!) 
同埋真係需要多d live house既存在! Live house係香港係缺乏既!
我地想用一個party既方法去令到未聽過band sound既人知道香港band sound係好玩好型既一件事 ! 有時我諗，如果話代表到80後既歌係Twins呢類，我會情願聽到代表80後既係一d樂隊或樂隊既歌，咁樣我地就會好開心!

FB page: https://www.facebook.com/NastyDudesHK

Youtube channel: https://www.youtube.com/channel/UClQtTy07AB6QfRU71I-sfag 

Friday's pick/周五挑 vol. 35 part 1 – Kaman Lau

Bom Voyage FB page每逢星期五都會刊登“Friday's pick/周五挑” 環節，介紹一下本地樂手/樂隊!

今次訪問左一位喺本地band界甚有影響力既朋友，借用佢既一d經歷同睇法，導出本地band scene同band show呢十年八載出現既變化! 佢係一位音樂會攪手，一位結他手，一位對樂器產品瞭如指掌既朋友 - Kaman Lau.




























Band齡有返咁上下朋友, 一定對Kaman (姐) 呢個名唔會有陌生既感覺!

想當年， 年紀輕輕既佢已經獨擔大旗，由2002年開始舉辦超過100場唔同類型既band shows! 
“第一次攪show，好記得係2002年既2月22日 (嘩!!)，當日有Miscast, Uneven等樂隊。 當時因為機緣巧合之下認識到屯門ive既負責人， 所以就開始左我人生第一次舉辦既band show!”

影響Kaman接觸樂隊同結他既係Beyond， 而indie band來講應該就係臨記! 熱愛樂隊文化既佢由攪show開始，之後仲學埋結他! 首位結他師傅就係Tat Flip既結他手嘉威!

從2004年開始以Music Gig名義舉辦唔同既band shows!  第一場Music Gig band show喺深水埗 “深青社” 舉辦，邀請到Black Wine，Sonic Temple， Zip Code (MR前身)同時 Rednoon等非常受歡迎既樂隊!  而對Kaman黎講，最 “瘋癲”既就係Yo Park年代，密集式舉行一連串既band shows，大概係2007-2008年左右。 

“其實我最鍾意係由零開始攪show， 即係一個本身冇器材既場地，而唔係已經 “存在”既livehouse。因為咁樣無論自己同觀眾都會有更大既新鮮感! 喺冇任何sponsor/資金既情況下，所有音響器材資源等等，都係Music  Gig真金百銀拎出黎! 試過有微利，亦試過蝕大本!  佢既熱誠同付出，的確換來唔少band友同觀察既支持! 

追溯至未有Facebook既年代，想搵一隊band出show全靠見面時搵對方“抄牌”，再以ICQ， MSN等通訊，甚至戰戰兢兢打電話邀請佢地出show!  其實近年香港既樂隊文化並冇變弱到，不過隨著時代變遷，科技越來越先進，多左Youtube，FB live等平台，同時近年出現大量buskers，  大家都認為音樂係得來容易既一樣東西! 大家都冇以前咁識珍惜一場band show或每一個有得睇band show既機會!


五年前Kaman來到新蒲崗一間樂器店工作! 工作繁忙，Kaman亦已大大減少以Music Gig既名義攪show了! 想了解更多關於Kaman既近況同樂器店既點滴，記住留意下一次既Friday’s Pick喇!

Bom Voyage - 樂遊邦: 

https://www.facebook.com/bomvoyage.hk/

Friday's pick/周五挑 vol. 32 – Band Aid

Bom Voyage FB page每逢星期五3pm都會刊登“Friday's pick/周五挑” 環節，介紹一下本地樂手/樂隊! 今日要介紹既係小編認識左好多年, 亦係一隊小編非常欣慰既本地樂隊- Band-Aid! 等左好多年, 終於等到佢地出碟喇, 巧興奮呀! Mark低12月2日呢個大日子喇大家! (BV = Bom Voyage, BA = Band-Aid) BV: 你地組成都有5年幾既時間! 呢5年你地覺得band scene有冇咩變化? BA: 不經不覺已組成5年，覺得Band Scene不斷改變，首先同期組成的樂隊，有些已消失或改組成別的樂隊，亦喜見不同新的樂隊出現，但整體感覺樂隊多了，音樂風格亦越見多元化。心態上其實沒有太大變化，還是繼續試不同喜歡的音樂風格。初組成時樂於參加比賽，因每次比賽都是一次演出機會，可以讓我們有更多不同演出機會，近年因主音Amy結婚、鼓手阿超結婚，早前又做埋老豆，又進入錄音階段，實在忙到不得了，所以靜左少少。 BV: 覺得香港玩音樂/夾band, 有咩辛酸史? BA: 作為獨立樂隊，大家都深深明白要在工作外的私人時間來夾Band，當大家都喜歡音樂時，這感覺好像做兩份工咁…忙上加忙，大概是所有Band仔的心聲，對我們亦如是。加上我們Band-Aid六個人，每個人的工作性質、工作時間亦不同，就時間夾Band絕對是最辛苦… BV: 終於等到你地出碟喇! 恭喜晒呀! 心情如何呀? BA: 心情當然相當興奮，大半年的錄音過程，雖然不算太辛苦，但都是一個相當難忘的經歷，畢竟這是我們首張唱片。 BV: 聽講你地搵左RubberBand阿偉做監製! 你地覺得大唔大壓力? 有冇咩得益呢? BA: 很高興能得到RubberBand阿偉擔任我們監製，其實沒有特別大壓力，因阿偉性格很溫和，一直循循善誘給我們寶貴意見，因不少成員均首次進錄音室錄音，阿偉除了幫我們錄音，更在編曲上給我們不同意見，讓我們的音樂更精彩！ BV: 有冇得透露少少有關新碟既野? BA: 今次同名新碟籌備了近一年，收錄六首歌曲，當中唱片設計有點心思，聽眾都能一起參與，暫時先賣關子。 BV: 黎緊除左宣傳新碟, 仲會有咩攪作呢? BA: 將會繼續寫新歌及演出。

FB page: 
https://www.facebook.com/Bandaidhk

Youtube channel:
https://www.youtube.com/user/bandaidhk

Friday's pick/周五挑 vol. 30 – Dear Miss Far Away

Bom Voyage FB page每逢星期五3pm都會刊登“Friday's pick/周五挑” 環節，介紹一下本地樂手/樂隊!

不經不覺，今次已經係第30期既Friday’s Pick喇! 首先再次多謝之前接受我地訪問既咁多位樂手/樂隊啦! 

今日搵到冇見好耐既Dear Miss Far Away! 本身已經差不多遺忘左佢地, 但小編一向記性ok, 如果睇過佢地出show比賽而又玩得叻叻既, 一定都會留下印象既!

(BV = Bom Voyage, D = Dear Miss Far Away)

BV: 做咩事唔見左你地一排架? 有咩咁忙先?
D: 我地之前係創作上有啲迷茫, 咁岩各自又有啲嘢要搞…所以暫停咗。但係我地正在搞返好以前啲歌，再warm up返就起會新歌啦!

BV: 咁你地自己而家有幾多首originals架?
D:  9首!

BV: 嘩, 都夠歌啦, 快D plan下出碟!
D: 我地想架 不過要計劃下…希望可以兩年內搞好!

BV: 聽講你地vocal鄒旻諾參加過超級巨星比賽架wor! 有冇d咩野可以同大家分享下呀?
D: 大家睇下呢條片就會知道更多架喇!

BV: 你地玩過咁多場show, 有冇話邊場係最難忘架?
D: 最難忘嘅演出應該係我地第一次係G&V出兩個鐘show。當時驚唔夠歌 搵咗啲表演嘉賓 包括sp'ACE, Brian Wong同埋巨聲伍富橋一齊玩! 當晚大家都好hyper!

BV: 黎緊有咩show出先?
D: 下星期會參加SMF(銀礦灣沙灘音樂節除)! 而11月18號會係G&V玩兩個鐘。呢兩個月仲會玩港澳果個樂隊比賽同埋青年樂隊中賽…希望入到圍啦!

FB page: 
https://www.facebook.com/DearMissFarAway/?fref=ts

Friday's pick/周五挑 vol. 29 – Zakki

Bom Voyage FB page每逢星期五3pm都會刊登“Friday's pick/周五挑” 環節，介紹一下本地樂手/樂隊!

今日要介紹既係一位好鍾意唱歌同埋寫詞既男生，Zakki! 擁有唔少比賽經驗既佢，究竟點解會對唱歌填詞產生興趣既?

(BV = Bom Voyage, Z = Zakki)

BV: 其實你幾時開始發覺自己係喜歡唱歌既?

Z: 讀緊中二嗰時好興唱 K ，同d同學仔一放假就約去唱K，又唱得好認真㗎喎，跟住就覺得唱歌都幾好玩! 嗰時無而家咁多地方學唱歌，一直鍾意唱但都無學，到讀完書畢業，發現原來有歌唱比賽可以參加，咁啲朋友鼓勵之下就參加咗第一個比賽。             諗住參加下唔一定入圍或者攞獎，而且聽到其他參賽者好有水準，嗰下覺得自己好渺小，我性格係做一件事就想認真做好佢，就立決心同屋企人講去學唱歌!                        

我啲朋友好鍾意唱四大天王嘅歌，之後我都迷上咗劉天王，覺得咁叻嘅，又唱歌，又作詞，又做戲，仲好有道理好意思㗎喎啲歌，我諗係受佢影響我開始唱歌之餘仲作埋詞。

BV: 咁不如你講下你一d你既比賽經歷，例如拿過咩獎，有咩難忘事?
Z: 我最記得第一個冠軍係葵青區新秀歌唱大賽，因為我一開始淨係敢合唱，獨唱我係驚到手震口震埋，嗰次的起心肝同自己講「要唔驚唔震唔走音唱哂全首」，最後攞到獎都真係好多謝評判同好好彩，嗰次好難忘!                        
第一個創作獎冠軍我記得係選舞台劇嘅才藝比賽，同禁毒有關嘅，嗰時我用「強」舊曲新詞咗首歌，另一個好難忘嘅係新城基本法舊曲新詞比賽，呢個題材真係好難，我記得我係特登去紅磡民政署攞咗本基本法嚟睇，一路刨一路作，作咗三個禮拜，最後攞到亞軍，第一次喺啤梨手上攞獎，好開心嘅一次經驗              

BV: 對於你黎講, 你會比較喜歡比賽定出show呢?Z: 表演同比賽唔同，比賽係規限咗，始終比賽有比賽需要嘅歌同演繹，同埋我比親賽都會驚或緊張。表演就唔會，好開心好舒服，我自問鍾意表演多過比賽，唱多啲唔同類型嘅歌，同觀眾分享自己嘅歌聲同音樂，又可以將自己嘅想法同感受唱俾唔同嘅人聽，有時仲可以同唔同嘅音樂人合作 jam 歌，唱歌最開心就係咁，合作首好歌出嚟分享俾聽衆。

BV: 有冇一d演出你係覺得好難忘架?         
Z: 有次一個敬老音樂會，叫咗嫲嫲爺爺去睇，揀咗首歌送俾佢地，點知講嘢嗰陣都已經喊到飛起，太感動，一開始唱唔到，要抹哂啲眼淚再叫樂隊奏過，嗰次自己都預計唔到，但最後演出都好順利好多感覺，另一個係喺新光劇院演出一套歌舞劇，除咗唱歌，始終第一次做舞台劇，跳舞簡直弱項😂，練習咗好耐，成日喺屋企練對白，呢個經驗都好難忘，好開心好感恩有份參與。

BV: 我知你開左Youtube channel, 黎緊會keep住拍唔同既videos呀!
Z: 係呀，大家想聽咩歌都可點歌㗎，無任歡迎，大家互動一下，除咗拍 cover videos 之外，都會放原創作品，一啲我嘅新歌俾大家聽，記得訂閱我嘅頻道呀!

BV: 好，黎緊有咩演出或大計先?
Z: 嚟緊梗係希望接多啲表演啦! 同埋作多啲廣東話歌，將歌聲唱俾更多未認識我嘅人聽。

Youtube channel: 
https://www.youtube.com/channel/UCXW6RdyuQqOUUb-Ix18X_Dw/videos?sort=dd&shelf_id=0&vie